پنجاب دھند

فیصل آباد / لاہور : پنجاب کے مختلف شہروں میں گہری دھند نے ڈیرے ڈال لیے، کاروبار زندگی شدید متاثر ہونے سے لوگ گھروں میں محصور ہوگئے۔

اس حوالے سے ملنے والی اطلاعات کے مطابق فیصل آباد ایئرپورٹ ذرائع کا کہنا ہے کہ دھند کے باعث ایئر لائنز پروازوں کا شیڈول بھی متاثر ہوا ہے، فیصل آباد میں حد نگاہ 700میٹرتک ہونے پر انٹرنیشنل فلائٹ آپریشن منسوخ کردیا گیا۔

ایئرپورٹ ذرائع کے مطابق دبئی اور شارجہ جانے والی نجی ایئر لائنز کی پروازیں منسوخ کی گئی ہیں جبکہ نجی ایئرلائن کی پرواز ایف زیڈ391 واپس دبئی بھیجنا پڑی۔

اس کے علاوہ دبئی سے آنے والی پرواز ایف زیڈ 371اسلام آباد کی طرف اور شارجہ سے آنے والی پرواز جی نائن 562لاہور ایئر پورٹ روانہ کردی گئی۔

دھند سے نہ صرف فضائی آپریشن بری طرح متاثر ہورہا ہے بلکہ زمینی سفر بھی ناممکن ہوگیا ہے، اس حوالے سے ترجمان موٹروے پولیس نے بتایا ہے کہ موٹروے ایم ٹو لاہور سے کوٹ مومن تک دھند کی وجہ سے بند اور ملتان موٹر وے فیض پور سے درخانہ تک دھند کی وجہ سے بند کردی گئی ہے۔

ترجمان موٹروے پولیس کے مطابق سیالکوٹ موٹر وے ایم 11 بھی دھند کی وجہ سے ٹریفک کیلئے بند کردی گئی ہے، سڑک کے سفر کے دوران ڈرائیورز آگے اور پیچھےفوگ لائٹس کا استعمال لازمی کریں۔

موٹروے ایم فور ،ملتان، خانیوال، مخدوم پور، عبدالحکیم سیکشن بند کردی گئی ہے، اس کے علاوہ احمد پور شرقیہ، جہانیاں شہر اور گردونواح میں شدید دھند کی وجہ سے حد نگاہ صفر ہوگئی۔



from ARYNews.tv | Urdu – Har Lamha Bakhabar https://ift.tt/yL4I85r