حنا ربانی کھر کا دورہ افغانستان، دفتر خارجہ کا اعلامیہ

اسلام آباد : وزیر مملکت برائے خارجہ امور حنا ربانی کھر نے افغانستان کا دورہ کیا اور اعلیٰ قیادت سے اہم ملاقاتیں کیں۔

اس حوالے سے ترجمان دفتر خارجہ کا کہنا ہے کہ حنا ربانی کھر نے افغان عبوری نائب وزیراعظم عبدالسلام حنفی سے ملاقات کی جس میں افغان وزیر معدنیات اور پیٹرولیم شہاب الدین دلاور بھی موجود تھے۔

دفترخارجہ کے مطابق افغان وزیر تجارت حاجی نورالدین عزیزی سے بھی ملاقات ہوئی، ملاقاتوں میں تعلیم، صحت، زراعت اور تجارتی امور پر تبادلہ خیال کیا گیا،۔

اس کے علاوہ سرمایہ کاری میں تعاون، علاقائی روابط، سماجی واقتصادی منصوبوں پر بھی گفتگو ہوئی حناربانی کھر نے پرامن، مستحکم، خوشحال افغانستان کیلئے پاکستان کے عزم کا اعادہ کیا۔

اس موقع پر حناربانی کھر نے افغانستان کی تعمیر نو کیلئے مالیاتی اثاثوں کو غیرمنجمد کرنے پر زور دیا دونوں جانب سے پائیدار دو طرفہ سیاسی مکالمے کی اہمیت پرزور دیا گیا۔

ترجمان دفترخارجہ کا کہنا ہے کہ پاک افغان تعلقات کو آگے بڑھانے کیلئےادارہ جاتی میکانزم کے اہم کردار پر اتفاق رائے، وسطی اور جنوبی ایشیا کےدرمیان افغانستان کی اہمیت پر بھی زور دیا گیا۔

ملاقاتوں میں علاقائی سلامتی کو بڑھانے،دہشت گردی کا مقابلہ کرنے کے امور پر بھی گفتگو کی گئی، اس کے علاوہ وزیر مملکت نے ویمن چیمبر کامرس کے نمائندوں کے ساتھ ظہرانے پر ملاقات کی۔

from ARYNews.tv | Urdu – Har Lamha Bakhabar https://ift.tt/VltqKJo